Geta sígildar barnabókmenntir stuðlað að nýjum leiðum til að takast á við félagslegar áskoranir samtímans? Áskoranir á borð við umhverfismál, jafnrétti kynjanna og menningarlegan fjölbreytileika?

Þetta er spurningin að baki Vatnsdropanum, nýju samstarfsverkefni norrænna menningarstofnana þar sem sígildar barnabókmenntir eru tengdar Heimsmarkmiðum Sameinuðu þjóðanna í gegnum fjölbreytta viðburði og vinnustofur, metnaðarfullar sýningar og útgáfu.

Eitt af stóru verkefnum Vatnsdropans er Ungir sýningastjórar, sem snýst um að bjóða börnum á aldrinum 9 – 12 ára, frá Íslandi, Danmörku, Finnlandi og Eistlandi, að taka þátt í að móta viðburðaraðir og sýningar til næstu þriggja ára. Börnin eru virkir þátttakendur í hugmyndavinnu og sýningarstjórn en verkefnið byggir á samþættingu lista, vísinda og umhverfisverndar. Vatnsdropinn miðar að því að hvetja börnin til að hugsa um og bregðast við brennandi og áleitnum spurningum í okkar samtíma. Með því er vonast til að sett verði ný viðmið um vinnu með börnum, þar sem þeirra hugmyndir, raddir og sköpunarkraftur eru virkjuð í samstarfi við fullorðna listamenn.

Vatnsdropinn er samstarfsverkefni Menningarhúsanna í Kópavogi, Múmínsafnsins í Tampere, H.C. Andersen safnsins í Óðinsvéum og Ilon Wonderland safnsins í Haapsalu í Eistlandi. Verkefnið er til þriggja ára með aðkomu fjölda alþjóðlegra menningarstofnana, safna, skóla og listamanna.

Vatnsdropinn er styrktur af Barnamenningarsjóði Íslands, Lista- og menningarráði Kópavogs, Nordplus, Norræna menningarsjóðnum og Erasmus Plus.